Улсын Их хурал

УИХ-ын чуулганы дэгийн тухай хуульд нэмэлт өөрчлөлт оруулж онцгой нөхцөлд цахимаар хуралдах дэгийг нэмсэн юм. Ингэхдээ онц байдал, дайн болон дайн бүхий байдал, олон улсыг хамарсан хөл хориот өвчин гарсан тохиолдолд УИХ цахим хуралдаан явуулна гэж тусгасан.

Тус хуулийн хэрэгжилт өнөөдрөөс хүчин төгөлдөр мөрдөгдөж байгаа юм. Харин ирэх сонгуулийн үр дүнгээр бүрдэх шинэ парламент ямар дэгээр хуралдахаа өөрсдөө шийдэж боломжтой байхаар хуулийн төсөлд тусгажээ. Цар тахалтай холбоотойгоор УИХ-ын хаврын чуулганыг 45 хоногийн хугацаанд хуралдуулан нэн яаралтай батлах хуулиудыг хэлэлцэхээр болсон. Хаврын чуулганы хугацаанд цахимаар хуралдах бөгөөд Үндсэн хуулийн нэмэлт өөрчлөлтийг ирэх сарын 25-наас мөрдөхтэй холбоотой 10 гаруй органик хуульд өөрчлөлт оруулах юм.