Үйл явдал

Өнгөрсөн долоо хоногт дотоодын халдвар илрээгүй 100 дахь өдрөө тэмдэглэсэн Шинэ Зеланд Улсад гэнэт дахин дотоодын халдвар бүртгэгдэж эхэлсэн. Мягмар гарагт тус улсын хамгийн том хот Оклэндийн нэг гэр бүлийн дөрвөн хүнээс халдвар илэрсэн юм.

Үүнээс хойш илэрсэн 13 шинэ тохиолдол бүгд дээрх гэр бүлийн гишүүдээс халдвар авсан нь тогтоогджээ. Хэдхэн хоногийн өмнө ганц ч халдварын идэвхтэй тохиолдолгүй байсан Шинэ Зеландад өнөөдөр 30 гаруй тохиолдол шинээр илрэн эмчлэгдэж байна. Хамгийн анх халдвар бүртгэгдссэн гэр бүлийн гишүүн нь хөлдөөсөн импортын хүнсний бараа хадгалдаг хөргөлттэй агуулахад ажилладаг байжээ. Тухайн агуулах нь АНУ-ын Americold Realty Trust компанийн Шинэ Зеланд дахь салбар юм. Халдвар гэнэт дахин илэрсэн шалтгааныг Шинэ Зеландын эрүүл мэндийн сайд хөлдүү бүтээгдэхүүнээр дамжин орж ирсэн байж магадгүй хэмээн мэдээлж байсан. Хятад улсад ч бас Америкаас ирсэн хөлдүү бүтээгдэхүүнээр дамжин вирус илэрсэн тохиолдол илэрсэн. Гэхдээ энэ шалтгааныг яг баттай гэх баримт байхгүй байна. Ямартай ч Оклэнд хотод тогтоогоод байсан хөл хориог дахин 12 хоногоор сунгасан тухай Ерөнхий сайд Яакинда Ардэрн мэдэгдлээ. Үүнээс гадна тэрээр “Энэ удаагийн дэгдэлт вирус ямар нарийн түвэгтэй, хэр хурдан тархдаг болохыг бидэнд дахин сануулж байна. Шаргуу ажиллах, эрт арга хэмжээ авах нь вирустэй тэмцэх хамгийн шилдэг арга зам юм. Бидний өмнөх туршлагаас харахад нөхцөл байдал сайжрахаас өмнө хүндрэл заавал тохиолддог. Тиймээс ойрын үед халдварын тохиолдол олноор нэмэгдэх нь тодорхой” гэж мэдэгджээ.