Үйл явдал

Вьетнамын нийслэл Ханой хотноо бизнес эрхлэгчдийн чуулга уулзалт болж байна. Вьетнам улс нь сүүлийн жилүүдэд эдийн засгаа тогтвортой хөгжүүлж, эдийн засгийн хөгжлийн хурдаараа дэлхийд 2-рт жагсч байгаа юм. 

Ханой хотноо энэ сарын 16-нд Вьетнамын засгийн газрын ивээл дор олон улсын бизнес эрхлэгчдийн чуулга уулзалт ажлаа эхэлжээ. Чуулга уулзалтыг Вьетнамын засгийн газрын шадар сайд Ву Дык Дам нээж, гадаад дотоодын бизнес эрхлэгчдийн хамтын ажиллагаа, хөрөнгө оруулалт, эдийн засгийн таатай нөхцөл бүрдүүлэх тал дээр Вьетнамын эрх баригчид ихээхэн анхаарал тавин ажиллаж байгаа талаар мэдэгдсэн байна. Үнэхээр ч  Вьетнам улс сүүлийн жилүүдэд худалдаа, эдийн засгийн салбараа нээлттэй хөгжүүлж, гадны хөрөнгө оруулалтыг бүх талаар дэмжин ажиллаж байгаагийнхаа үрээр дэлхийн эдийн засаг нь хамгийн хурдацтай хөгжиж байгаа улс орны нэг болж чадсан юм. Ингэхдээ эдийн засгаа мэдээллийн технологи, ХАА, худалдаа, аж үйлдвэрлэл, аялал жуулчлал, боловсрол гэхчлэн бүхий л салбарт адил тэнцүү, нээлттэй хөгжүүлж байна. Ханой хотноо ажлаа эхэлсэн бизнес-эдийн засгийн чуулганд 800 гаруй төлөөлөгч, тэр дундаа гадны 300-аад төлөөлөгч оролцож байгаа юм.