Архив...

Засгийн газар

Улсын хэмжээнд ноолуур гүн боловсруулдаг 20 гаруй аж ахуй нэгж үйл ажиллагаа явуулж байна. Дээрх газруудын ноолуур бэлтгэх үнийн саналд тулгуурлан 1 кг ноолуурын үнийг 100 мянган төгрөгөөс буулгахгүй байхаар засгийн газар бодлого боловсруулсан.

Тодруулбал, 100 тонноос дээш ноолуур бэлддэг 10 үйлдвэр кг ноолуурыг 100-110 мянган төгрөгөөр бэлдэх үнийн санал илгээжээ. Харин 50-100 тонн ноолуур бэлдэх хүчин чадалтай 5 үйлдвэр 90-100 мянган төгрөгийн үнийн санал илгээсэн байгаа юм. Тиймээс дээрх саналуудад үндэслэн 1 кг ноолуурыг 100 мянган төгрөгөөс буулгахгүй байхын тулд Хөгжлийн банкнаас 300 тэрбумийн хөнгөлөлттэй зээл олгохоор шийдвэрлэсэн. 

Ноолуур бэлдэх аж ахуй нэгжүүдэд жилийн 3 хувийн хүүтэй 300 тэрбум төгрөгийн зээлийг олгохын тулд Засгийн газар 30 тэрбум төгрөгийн хүүгийн зөрүүг гаргаж байгаа. Гэвч ноолуур бэлдэх зарим аж ахуй нэгжүүд сарын хугацаанд ажилтнаа цалингүй амраах улмаар олон жил ажилласан зарим ажилтнаа чөлөөлөх зэрэг асуудлыг хөндөж эхлэжээ.

Тиймээс хөнгөлөлттэй зээл авч байгаа аж ахуй нэгжүүдэд цомхтол хийхгүй байх үүргийг хүлээлгэж байгааг хэллээ.

Зээлийн хүсэлт гаргасан аж ахуй нэгжүүдэд тусгай данс нээн арилжааны банкаар дамжуулан олгох юм байна. Банкны зээлийн нөхцлийг хангаж байгаа гурван компани л одоогоор байгааг хэллээ. 300 тэрбум төгрөгийг ноолуурын үнэд шилжүүлэн тооцвол өнгөрсөн онд борлуулсан ноолуурын хэмжээтэй дүйцэж байгаа юм. Тиймээс онцгой нөхцөл тул уян хатан хандаж бусад аж ахуй нэгжүүдэд боломж олгож байгааг салбарын сайд онцоллоо.