Улсын Их хурал

Энэ удаагийн Улсын их хурлын сонгуульд өрсөлдөх нэр дэвшигчид бүгд Авлигатай тэмцэх газарт хөрөнгө орлогын мэдүүлгээ хүргүүлэх учиртай. Сонгуулийн өмнө ямар хөрөнгөтэй байсан, дууссаны дараа хэрхэн өөрчлөгдсөнийг эндээс харж болох юм. Нэр дэвшигчид мэдүүлгээ ирэх Бямба гараг гэхэд Авлигатай тэмцэх газарт цахимаар өгөхөөр зохицуулалт хийгджээ.

УИХ-ын найм дахь удаагийн сонгууль сар гарны дараа болох гэж байна. Энэ жилийн тухайд нэр дэвшигчдийн хөрөнгө орлогын мэдүүлгийг Авлигатай тэмцэх газар авч байгаа тул иргэд, сонгогчид цахимаар үзэх бүрэн боломжтой. Өнөөдрийн байдлаар 29 тойрогт бие даан нэр дэвшихээ илэрхийлж Аудитын газарт бүртгүүлсэн 202 хүн байгаа. Дээрх хүмүүс өнөөдрөөс Авлигатай тэмцэх газарт өөрийн болоод гэр бүлийнхээ хөрөнгө орлогын мэдүүлгийг өгөх учиртай. Харин нам эвслүүд 16-ны дотор нэр дэвшигчдээ тодруулах тул 17,18,19-ний өдрүүдэд багтаан нэр дэвшихээр сонгогдсон хүмүүс ХОМ өгөх ёстойг хэллээ.

НЭР ДЭВШИГЧИД АТГ-Т ХӨРӨНГӨ ОРЛОГЫН МЭДҮҮЛГЭЭ 19-НИЙ ДОТОР ХҮРГҮҮЛНЭ

АТГ нэр дэвшигчдийн хөрөнгө орлогын мэдүүлгийг нэгтгэн 6-р сарын 2-ны өдөр албан ёсоор цахим хуудсандаа байршуулах юм. Өмнө зөвхөн цаасаар авдаг байсан хөрөнгө орлогын мэдүүлэг цахим хэлбэрт шилжсэн нь илүү дэлгэрэнгүй болж байгааг хэллээ.

Өмнөх сонгуулиудаар УИХ-ын гишүүн болсон 76 хүний хөрөнгө орлогын мэдүүлгийг авдаг байсан. Одоо бүх нэр дэвшигчдийн мэдүүлэг цахим хуудсанд байршиж байгаа тул УИХ-ын гишүүнээр сонгогдсон хойно нь, болоод гишүүнээр ажиллах хугацаанд нь харьцуулан үзэх боломжтой байхаар зохион байгуулжээ.