Технологи

Өмнөд Солонгосын Samsung компанийн Galaxy S10 загварын ухаалаг гар утас нь ямар ч хамаагүй хурууны хээгээр нээгддэг болохыг компани хүлээн зөвшөөрчээ. Ингэснээр Galaxy S10 загвар нь нууцлалын хувьд тийм ч өндөр хамгаалалттай биш болох нь батлагдсан байна. Samsung компани энэ алдаагаа засч, хамгаалалтыг өндөр түвшинд аваачихын тулд программ хангамжин дээр нь ажиллаж байгаа гэжээ.

Samsung Galaxy S10 загвар нь хамгаалалтын хувьд үйлдвэрлэгчдийн амлаж байгаа шиг өндөр хэмжээнд биш болохыг гар утсаа өөр хүний хурууны хээгээр нээж чадсан Британийн нэгэн эмэгтэйн үйлдлээр ил болжээ. Энэ оны 3-р сард Galaxy S10 загвараа танилцуулж, худалдаанд гаргасан Samsung компани энэ загварын ухаалаг утас хамгаалалтын хувьд технологийн хувьсгал хийсэн болохыг мэдэгдэж, зөвхөн тухайн таниулсан хурууны хээгээр л утас нээгдэнэ гэж байсан юм. Galaxy S10 загварын ухаалаг гар утсанд хурууны хээг таних 3D технологийн сканер суулгасан учраас хамгаалалтын тал дээр илүү боловсронгуй болсон гэж Samsung компани мэдэгдэж байсан юм. Гэвч энэхүү амлалт нь үнэн хэрэгтээ тийм ч найдвартай, бат бэх биш болохыг Британийн гэр бүлийн хоёр олж илрүүлснийг Samsung компани ч хүлээн зөвшөөрчээ.

Британийн иргэн Лиза Нильсон eBay-с гар утасны хамгаалалтын хальс 2,7 фунтээр худалдан авч, түүн дээрээ баруун гарынхаа эрхий хурууны дардсыг даржээ. Гэвч дараа нь тэрээр санамсаргүй зүүн гарынхаа эрхий хурууг дарсанд утасных нь түгжээ тайлагдсан байна. Улмаар эмэгтэй нөхрөөсөө түүний утасны түгжээг өөрийнхөө хурууны хээгээр гаргахыг хүсэхэд утас нь өөр хүний хурууны хээгээр мөн тайлагдсан байна. Тэд Samsung Galaxy S10 загварын өөр хүний утсан дээр үүнийгээ дахин шалгахад мөн л хурууны хээгээр нь түгжээ нь тайлагджээ.