Entertainment

K-Pop буюу Өмнөд Солонгосын поп урлагийн ертөнцийн бас нэгэн томоохон төлөөлөл болсон жүжигчин, дуучин Гу Хара Сөүл дахь гэртээ амьсгал хураасан байдалтай олджээ. Түүнээс өмнө өнгөрсөн сард K-Pop-ын бас нэгэн од Солли цахим ертөнц дэх олны хэл ам, дарамт  шахалтаас шалтгаалан амиа егүүтгэн нас барж байсан юм. Гу Хара болон Солли нар их дотно найзалзаг, бараг эгч дүүс шиг харилцаатай байсан гэж Гу Хара ярьж байсан ч ийнхүү сар хүрэхгүй хугацааны дараа түүнийг мөн амьсгал хураасан байхыг нь олжээ. 

KARA хамтлагийн экс гишүүн, дуучин, жүжигчин Гу Хара 28 настай байжээ. Тэрээр 2008 оноос эхлэн KARA хамтлагт дуулж байгаад сүүлийн хэдэн жил соло уран бүтээл туурвих болсон юм. Тэрээр дууны бие даасан цомог гаргаж, кинонд тоглож, өнгөрсөн долоо хоногт хэд хэдэн тоглолт хийгээд байжээ. Гу Хара ямар шалтгааны улмаас нас барсан болохыг цагдаа нар нягтлан шалгахаар ажиллаж байна. Дуучин бүсгүй өнгөрсөн 5-р сард амиа хорлохыг завдан, улмаар эмнэлэгт хүргэгдэж байжээ. Сүүлд Гу Хара шүтэн бишрэгчдээсээ хүлцэл эрж, түүний төлөө санаа зовох хэрэггүй гэж мэдэгдэж байсан юм. Тэгвэл Гу Хараг түүний Сөүл дэх Ганнам дүүргийн гэрээс нь цагдаа нар нас барсан байдалтайгаар олсон байна. Гу Хара өөрийн инстаграм хуудсан дээрээ хамгийн сүүлд “тайван нойрсохыг” хүссэн пост оруулсан байжээ.

Энэ онд Гу Хана Японы продюсерын компанитай гэрээ байгуулан, ердөө хэдхэн долоо хоногийн өмнө Midnight Queen сингл дуугаа гаргаад байжээ. Түүний уран бүтээл амжилттай байсан хэдий ч хувийн амьдрал нь бүтэмжгүй байсан гэж шар хэвлэлүүдэд бичиж байсан юм. Гу Хара 2018 оны 9-р сард хуучин найз залуугаа шүүхэд өгч, тэдний үерхэж байхдаа авхуулсан хувийн чанартай зураг сэлтийг олон нийтэд дэлгэхээр сүрдүүлсэнд буруутгаж байжээ. Түүний экс найз залууг шүүхээс дуучин бүсгүйн эрх чөлөөнд халдаж, сүрдүүлсэн хэргээр тэнсэн харгалзах ялаар шийтгэж байжээ.