Entertainment

Эрдэмтэн судлаачид Перугийн өмнөд хэсгээс хад чулуун дээр зурсан эртний Наски-гийн хадны зураг сэлтийг нэмж илрүүлжээ. Энэ удаад нийтдээ 143 шинэ геоглиф илрүүлсэн байна.


Шинээр илрүүлсэн зурган дунд хүн, ан амьтад, бусад амьд биетийг дүрсэлсэн байна. Наскигийн геоглиф нь асар том хэмжээтэйгээр зурагдсан байдаг учраас зөвхөн агаараас, өндрөөс дүрс, зургийг ялгаж ажиглах боломжтой байдаг юм. Шинээр олж илрүүлсэн хадны зурган дунд шувуу, сармагчин, загас, могой, үнэг, муур, лам гөрөөс зэргийн зураг байгаа гэнэ. Эдгээр зургийг хад чулууны өнгөн хэсгийн зорох замаар зурсан байдаг юм. Хадны өнгөн хэсэг дэх хар хэсгийг зорсноор доороос нь шаргал өнгөтэй элсэн давхарга цухуйж, улмаар зургийг ялган харах боломж олгодог байна.

Шинээр олсон хадан дээрх зураг сэлт нь 5-50 метрийн хэмжээтэй, хамгийн том геоглиф нь 100-аад метрийн урттай гэнэ. Нээлтийг Япон дахь Ямагатагийн их сургуулийн эрдэмтдийн баг сансрын хиймэл дагуулаас авсан зураг сэлтийг судлан илрүүлжээ. Тэд тухайн газар орны аэрофото зургийг лазерын аргаар судлан, зөвхөн агаараас, өндрөөс харагдах зураг сэлтийг илрүүлсэн байна. Перугийн өмнөд нутгаас олддог Наскагийн хадны зураг нь 1700-2100 жилийн өмнө бүтээгдсэн байдаг юм.

Эдгээр ховор нандин олдвор эртний Наскагийн соёл иргэншлийн нууцыг хүн төрөлхтөнд тайлдаг байна. Эрдэмтдийн судалгаагаар хамгийн эртний Наскийн геоглиф нь м.э.ө 100 оноос м.э 100 жилийн хооронд бүтээгдсэн гэж үздэг байна.