Үйл явдал

Израилд коронавирусийн халдварын тархалт сүүлийн өдрүүдэд огцом нэмэгдсэнээр дахин хөл хорио тогтоолоо. Улсын уламжлалт баяр Еврейн шинэ жилийн баярын үеэр хатуу хязгаарлалт тогтоосон байна. Харин иргэд энэ шийдвэрийг эрс эсэргүүцэж байгаа юм. 

Израил  улс нь коронавирусийн цар тахал эхэлсэн цагаас хойш хоёр дахь удаагаа өндөржүүлсэн хөл хорио зарлаж байна.  Хөл хорионы дэглэм ирэх Баасан гариг буюу 09.18-аас эхэлж, багадаа гурван долоо хоног үргэлжлэх юм. Нийт есөн сая гаруй хүн амтай Израилд халдварын 153 мянга гаруй тохиолдол илэрч, 1108 хүн нас барсан байна. Сүүлийн үед нэг өдөрт илрэх халдварын тохиолдол нь 4000 хүрч өссөн учраас хөл хорио тогтоох шийдвэр гаргасан гэж улсын эрх баригчид тайлбарлаж байна. Үүнээс өмнө энэ оны гуравдугаар сарын сүүлээс тавдугаар сарын эхэн үе хүртэл хөл хорио тогтоож байсан. Энэ удаагийн хөл хорионы журмын дагуу дотоод орчинд 10-аас дээш тооны хүн, гадаад орчинд 20-оос дээш тооны хүн цугларахыг хориглож, сургууль, худалдааны төвүүдийг хааж, ажилд явахаас бусад зорилгоор гэрээсээ 500 метрээс хол явахыг хоригложээ.