Үйл явдал

Мягмар гарагийн орой Прага хотод 500 метр урт ширээ засан, коронавирусийг үдэх үйл ажиллагаа явуулсан байна. Урт ширээ засан иргэд баяр ёслолын байдалтайгаар халдварт өвчнийг үдэж байгаа бичлэг дэлхийн хэвлэлүүдийн онцлох сэдвүүдийн нэг болоод байна.

Өнгөрсөн Мягмар гарагаас эхлэн Чех Улсад амны хаалт заавал зүүх шаардлагыг цуцлан, ресторан, баарнуудын үйл ажиллагааг эргэн нээсэн байна. Коронавирусний тархалт буурсан учраас зүүн хойд Моравиа-Силезээс бусад бүх газар нутагт хорио цээрийн дэглэмийг сулруyлах арга хэмжээ авч эхэлсэн нь энэ. Хөл хорио цуцлагдан өмнөх эрх чөлөөт амьдралаа дахин эхлүүлж байгаа Прага хотын иргэд Мягмар гарагийн орой коронавирусийг үдэх арга хэмжээг 600 жилийн түүхтэй Карлын гүүрэн дээр өвөрмөц аргаар тэмдэглэн өнгөрүүллээ.

Хотын 2,000 орчим иргэн энэхүү гүүрэн дээр 515 метр урт хоолны ширээ зассан байна. Сүүлийн долоон өдөр дараалан Прага хотод 100,000 оршин суугч тутамд ноогдох халдварын тохиолдол тав дотор байсан нь ингэж тэмдэглэх шалтгаан гэж үзжээ. Өнөөдрийн байдлаар Чех Улсад 12 мянган халдварын тохиолдол бүртгэгдсэнээс 349 нь нас барж, долоон мянга гаруй иргэн эдгэрэн, 3,900 иргэн одоо эмчлэгдэж байна.