Үйл явдал

НҮБ дахь Бельги, Эстони, Франц, Герман, Их Британи болон Польшийн суурин төлөөлөгч нар хамтарсан мэдэгдэл хийж, Умард Солонгосын цөмийн баллистик пуужингийн туршилтыг эсэргүүцсэн мэдэгдэл хийжээ. Тэд Нью Йорк дахь НҮБ-ын төв байранд энэ талаар тусгай мэдэгдэл хийж, Пхеньяны өдөөн хатгасан алхмыг эсэргүүцсэн байна. 

НҮБ-ын гишүүн улс орнуудыг төлөөлж Польшийн суурин төлөөлөгч Жоанна Вронецка мэдэгдэл хийжээ. Тэрээр мэдэгдэлдээ Умард Солонгосын тал өнгөрсөн 5-р сараас хойш нийтдээ 13 удаа цөмийн баллистик пуужингийн туршилт явуулж, олон улсын эсэргүүцлийг үл харгалзан цөмийн зэвсгийн хөтөлбөрөө үргэлжлүүлж байгааг эрс шүүмжлэн, Солонгосын хойгийн бүс нутаг дахь өдөөн хатгасан үйлдлээ таслан зогсоохыг шаарджээ. Пхеньян олон улсын нийгэмлэгээс тавьж байгаа хоригийг үл харгалзан цөмийн пуужингийн туршилт явуулсаар байгаа нь зөвхөн бүс нутгийн төдийгүй олон улсын аюулгүй байдалд сөргөөр нөлөөлж байгааг тэмдэглэсэн байна. Тиймээс цаашид өдөөн хатгасан ямарваа үйлдэл гаргавал олон улсын нийгэмлэг Пхеньяны эсрэг хоригоо чангатгахаас аргагүй байдал үүснэ гэдгийг сануулсан байна.