Улс төр

Францад шинэ засгийн газар эмхлэн байгуулагдаж, сайд нараа томилжээ. Францын ерөнхийлөгч Эммануэль Макрон ерөнхий сайд Эдуар Филипп суудлаасаа буусны дараагаар шинэ засгийн газраа эмхлэн байгуулж байгаа юм. Энэ сарын 3-нд Францын ерөнхий сайдаар Прад гэх жижиг хотын мэр басан Жан Кастекс томилогдож, шинэ засгийн газраа байгуулах ажилдаа оржээ. Елисейн ордны мэдээлж байгаагаар засгийн газарт 16 сайд, тэдний орлогчид багтаж байгаа юм.

Францын засгийн газрын бүрэлдэхүүнд хэд хэдэн сэлгээ хийгдсэн ч гол яамдын сайд нар хэвээр үлдсэн байна. Жан-Ив ле Дриан Францын шинэ засгийн газарт гадаад хэргийн сайдын үүргийг үргэлжлүүлэн гүйцэтгэнэ. Батлан хамгаалах яамыг энэ албыг сүүлийн 3 жил тэргүүлж байгаа Флоранс Парли мөн тэргүүлэхээр улиран сонгогдсон байна. Францын эдийн засаг, сангийн яамыг Брюно Ле Мэр мөн үргэлжлүүлэн тэргүүлэхээр болжээ. Тэгвэл шинэ засгийн газарт орсон томоохон өөрчлөлтүүдийн дотор Францын хуульзүйн яамыг Николь Беллубэ-гийн оронд нэртэй өмгөөлөгч Эрик Дюпон-Моретти тэргүүлэхээр сонгогдлоо. Соёлын яамыг Франк Ристерын оронд Розлин Башло тэргүүлэхээр болсон байна.

Энэ мэтчилэн халаа сэлгээ, хуучин томилгоо хийгдэж, ерөнхий сайд Жан Кастекс тэргүүтэй Францын шинэ засгийн газарт 16 сайд, 14 орлогч сайд нар томилогджээ.

Францад ийнхүү засгийн газраа шинэчлэн байгуулсан нь ерөнхий сайдаар ажиллаж байсан Эдуар Филипп засгийн газрын тэргүүний суудлаасаа огцорч, Францын томоохон ажил хэрэгч-боомт хот болох Гаврын мэрээр сонгогдон явсантай холбоотой юм.