Улс төр

Хонконг дахь нөхцөл байдал хяналтаас гарч байна... Ийм мэдэгдлийг Хонконг арлын эрх баригчид, хүчний байгууллагууд хийж байгаа юм. Тэдний мэдэгдсэнээр ардчиллын төлөө тэмцэгчид гэж өөрсдийгөө нэрлэсэн жагсагчдын зохион байгуулж байгаа эсэргүүцлийн жагсаал цуглаан улам бүр хяналтаас гарч, үймээн самуун, мөргөлдөөн болон хувирч байна. 

Хонконгийн жагсагчид төв замуудыг хааж, авто зам дээгүүр янз бүрийн том зүйлс авчирч тавин, зам гүүрийг эвдэж сүйтгэж байгаан дээр автозамын хөдөлгөөнийг ч мөн алдагдуулж байна. Мөн жагсагчид их дээд сургуулиудын хичээл сургуулийг хэвийн явуулах нөхцөлгүй болгож, хаа сайгүй эмх замбараагүй байдал дэгдээж байна. Мягмар гарагт Хонконгийн цагдаа нар жагсагчдыг тараахын тулд резинэн сум, нулимс асгаруулах хий цацахаас аргагүй байдалд оржээ. Энэ өдөр хууль сахиулагчид 12-87 насны нийтдээ 287 хүнийг олон нийтийн хэв журмыг алдагдуулсан хэргээр баривчилсан байна.

Хонконгийн цагдаагийн албаны хэвлэлийн төлөөлөгч Кун Винчэн: -Хонконг дахь хууль журам, олон нийтийн эмх журмыг сахин хамгаалах үйл явц хүнд байдалд байна. Нүүрээ халхлан маск зүүсэн этгээдүүд тэд хуулиас гадуур гэж өөрсдийгөө санан олон нийтийн эмх журмыг зөрчин, хүчирхийллийг гааруулж байна гэжээ.

Тэгвэл Хонконгийн жагсагчид тэдний жагсаал цуглаан ийнхүү гаарч байгаа нь цагдаа хүчнийхэн тэдний эсрэг хүч хэрэглэж байгаатай холбоотой гэж тайлбарлаж байгаа юм. Сүүлийн өдрүүдэд Хонконгийн жагсагчдын эсрэг хууль хүчнийхэн байлдааны сум ашигласан гэх гомдол газар аваад байгаа юм.