Нийгэм

Өнгөрсөн сар гаруйн хугацаанд тарваган тахлын 20 гаруй тохиолдол бүртгэгдэж 5 нь батлагдлаа. Дэлхийг түгшээж байгаа ковид-19 халдвараар Монгол Улс ганц ч иргэнээ алдаагүй ч тарваган тахлаар 14 хоногийн дотор гурван хүн амь насаа алдлаа. Тахлын улмаас амь насаа алдсан хүмүүсийн цогцсыг ар гэрийхэнд нь өгдөггүй журамтай. Эмнэлгийн тусгай баг чандарлажээ.

Есдүгээр сарын 14-ний байдлаар есөн аймгийн 12 сум, Улаанбаатар хотын хоёр дүүргээс тарваган тахлын сэжигтэй нийт 20 тохиолдол бүртгэгдсэн. Эдгээрээс Ховд аймагт 3, Говь-Алтай, Завхан аймагт тус бүр нэг, нэг нийт таван онош батлагдаж, хүндэрсэн гурван хүн нас барсан байна.  Энэ сарын 10-нд Ховд аймгийн Эрдэнэбүрэн суманд тарваган тахлын сэжигтэй тохиолдол бүртгэгдэж, сорьцыг Улаанбаатарт авчирч шинжлэхэд онош үгүйсгэгдсэн юм.   

ЗӨСҮТ-д энэ жил мэрэгч амьтантай холбоотой дуудлага өнгөрсөн оноос хоёр дахин нэмэгджээ. Үүнийг дагаад тарваган тахлын эрсдэлд өртөж байгаа тохиолдол нэмэгдэж байгаа гэлээ. Иймд иргэд тарвагатай харьцахгүй, агнахгүй, түүхий эд, махыг нь хэрэглэхгүй байхыг мэргэжлийн байгууллагаас зөвлөж байна.