Нийгэм

Манай улсын түүхэн сумуудын нэг бол Халхгол. Дайнаас хойш нам гүм байсан зүүн хязгаарт Сангийн аж ахуй байгуулснаар өнөөдрийн сум бий болжээ. Сангийн аж ахуй байгуулагдахад ирсэн анхны иргэдээс цөөн хэдэн хүн Халхгол сумандаа аж төрж байна. Тэдний нэг бол өндөр настан М.Хишигт гуай. Халхгол сумынхаа хаана юу байдагийг цээжээрээ нэрлэж, аль хэсэгт мал хариулбал тарга хүч сайн авдагийг төвөггүйхэн хэлж өгсөөр сууна. Сумын анхны иргэн М.Хишигийг үзэгч тантай уулзуулъя.

1972 онд Халхгол сангийн аж ахуй байгуулагдаж улсын өнцөг булан бүрээс илгээлтийн эзэд ирцгээжээ. Тэдний нэг нь М.Хишигт гуай. Ховд аймгийн Дөргөн сумаас гэр бүлийн хамт 9 жилийн хугацаатай Халхгол суманд мал маллахаар ирцгээсэн байна. Хугацаа нь дуусаад буцах хүсэлт гаргатал тухайн үеийн сангийн аж ахуйн захиргаа та нарыг улсын нэг булангаас нөгөө өнцөг хүртэл хүргэж байдаг завтай хүн алга гэж хэлээд мал маллах хугацааг нь гурван жилээр сунгажээ. Ингээд л М.Хишигт гуай буцах тухай дахин ярихаа болж сумандаа өнөөдрийг хүртэл амьдарсан байна.

М.Хишигт гуай сангийн аж ахуйд Сүхбаатарын Эрдэнэцагаанаас авч ирсэн үхэр голдуу маллаж байсан байна. Харин 1987 оноос эхлэн эм хонь хариулсаар зах зээлтэй нүүр тулжээ. Тухайн үед ноос ноолуур 75 хувиас дээш бүрдүүлж өгөх нормтой. Бүгдийг нь давуулан биелүүлж 600 төгрөгийн цалингаа бүтэн авдаг байснаа М.Хишигт гуай ярилаа. Өнөөдрийн хувьд Халхгол сумын газар нутаг үржил шимтэй хэвээр байна. Залуу малчдад хаана өнтэй сайхан өвөлжиж болох, малаа аль нутгаар хариулбал тарга хүч илүү авахуулах боломжтой гээд бүхий л мэдлэгээ хуваалцаж байгаагаа М.Хишигт гуай ярилаа.

М.Хишигт гуай Халхгол суманд мал маллахаас гадна аймаг, сумын депутатаар хоёр удаа ажиллажээ. Улсын мал 40 гаруй жил хариулахдаа үүрэг даалгавраа үргэлж давуулан биелүүлсэн түүнийг хөдөлмөрийн хүндэт медаль, хөдөө аж ахуйн тэргүүний ажилтан цол тэмдэгээр шагнажээ.