Нийгэм

Коронавирусийн халдвар бүртгэгдсэнтэй холбогдуулан Улсын онцгой комисс өнөөдөр хуралдлаа. Дэлхийн нийтийг хамраад байгаа энэ өвчин хэнийг ч ялгахгүй халдварлаж байгаа. Эгзэгтэй ийм цаг үед хэн нэгнийг буруутгахаас илүү тайван байж, заавар зөвлөмжийг дагаж, сахилга баттай байхыг шадар сайд Ө.Энхтүвшин сануулсан байна. Гаднаас ирсэн иргэд өндөр эрсдэлтэй гэдгийг сайтар мэдэж байгаа учраас тархах аюулыг нягт хянаж байгааг Улсын онцгой комиссоос мэдээллээ.

Гадны улсад хүндхэн нөхцөл байдалтай байгаа иргэдээ яаралтай авч ирэх шийдвэрийн хүрээнд 732 иргэн эх орондоо ирээд байна. Тус иргэдээс гурван хүн Коронавирусийн халдвартай болох нь хоёр удаагийн шинжилгээгээр баталгаажсан. Үүнтэй холбоотой цахим орчинд янз бүрийн сэтгэгдэл хөвөрч бухимдах иргэд ч байгаа юм. Тэгвэл Коронавирус тархсан орнуудаас иргэдээ авч ирж байгаа эрсдэлийг тооцон вирусийн халдвартай хүн ирэхэд бэлэн байдлыг хангасан байжээ. Тиймээс шуурхай ажиллаж шаардлагатай арга хэмжээ авсан гэдгийг Онцгой комиссын дарга онцоллоо. Хамгийн гол нь иргэд тайван байж баталгаатай эх сурвалжаас мэдээлэл авч байхыг хүссэн юм.

Өнөөдрийн байдлаар вирусийн халдвар авсан гурван монгол иргэний ойролцоох 111 хүнээс шинжилгээ авчээ. Эхний байдлаар 61 хүн коронавирусийн халдвар аваагүй болох нь тогтоогдсон байна. Чартер нислэгээр ирсэн иргэд тухайн улсдаа шинжилгээ өгөх боломжгүй байсныг хэллээ. Харин цаашид дахин нислэг хийх эсэхийг судлаж байж шийдвэрлэнэ гэсэн юм.

Шинээр вирус илэрсэн гурван иргэнийг яаралтай эмчилгээнд хамруулан ажиллахаас гадна Франц иргэнд хийгдэж байгаа эмчилгээ үр дүнгээ өгч байгааг Эрүүл мэндийн сайд хэллээ. Манай улс коронавирусийн халдвараас гурван сарын хугацаанд амжилттай сэргийлэн ажилласан. Энэ хугацаанд эрүүл мэндийн салбар бэлтгэлээ чамгүй базаасан гэдгийг ч онцоллоо. Дэлхийн өндөр хөгжилтэй орнууд нийт хүн амынхаа 0.1-1.4 хувийг нэгэн зэрэг эмнэлэгт хэвтрүүлэн эмчлэх боломжтой байгаа гэнэ. Тэгвэл манай улсын тухайд БНХАУ-тай адил нийт хүн амынхаа 0.4 хувийг хэвтүүлэн эмчлэх боломжтойг хэлж байна.

Чартер нислэг хийхэд мэргэжлийн хяналтын хоёр байцаагч, нэг зураглаач явсан. Зураглаачийн тухайд Солонгос улсад байгаа иргэдийн нөхцөл байдлыг дүрсээр баримтжуулах зорилгоор явуулжээ. Дээрх хүмүүсийг журмын дагуу тусгаарлан хянаж байгааг онцоллоо.

Улсын онцгой комиссын дараагийн хуралдаанаар сургууль цэцэрлэгийн хязгаарлалтыг сунгах эсэхийг шийдэхээр боллоо. Үүнээс гадна Баян-Өлгий аймаг руу орох гарах хөдөлгөөнийг нээх эсэхийг тусгаарлаад байгаа иргэдийн шинжилгээний хариунаас шалтгаалан шийдвэрлэнэ гэлээ.