Нийгэм

Өнгөрсөн амралтын өдрүүдэд Богд хан уул болон Хандгайтад  баавгай үзэгдсэн, мөр нь олдсон гэдэг мэдээлэл сошиалд цацагдаж эхэллээ. Байршлын хувьд иргэдийн очиж амардаг хэсгүүд байгаа учраас мэргэжлийн байгууллагаас ажлын хэсэг гарч судалгаа хийсэн байна. Олдсон мөр, үлдээсэн шинж тэмдэг нь баавгайных мөн  болохыг судлаачид хэллээ.  

Мөн өчигдөр Чингэлтэй дүүргийн 19-р хороо Хандгайт орчимд баавгайн мөр илэрсэн байна. Нийслэлийн байгаль орчны газраас тухайн мөрийг шинжилж, Улиастай чиглэл рүү явсан болохыг тогтоосон. Мөн тухайн бүсэд амьдарч байгаа иргэдэд сэрэмжлүүлэг хүргэн ажиллажээ.

Богдхан уулнаас баавгай дайжаад 100 орчим жил болсон. Анхны мөр илэрч байгаа тохиолдол энэ удаагийнх. Гэтэл тус ууланд амралтын өдрүүдэд 3000-4000 иргэд амарч зугаалдаг. Тиймээс баавгайн мөр илэрч байгаа газруудад ганц нэгээрээ зугаалахгүй байх, хэрэв баавгайтай таарвал нүд рүү харж, огцом хөдөлгөөн хийхгүй байхыг анхаарууллаа.