Халуун сэдэв

Маргааш орон нутгийн сонгуулийн санал хураалт явагдах гэж байна. Энэ удаагийн орон нутгийн сонгууль хуулиар босго ирцгүй болно. Өөрөөр хэлбэл хэн их санал авна тэр нэр дэвшигч ялалт байгуулах юм. Санал хураалт явагдах өдөр улс орон даяар бүх нийтээр амарч, олныг хамарсан ямар нэг арга хэмжээ зохион байгуулагдахгүй. Улсын хэмжээнд хэсгийн хороод санал авахад бэлэн болж, техник тоног төхөөрөмжөө бүрэн суурилуулж дууссаныг Сонгуулийн ерөнхий хорооноос мэдээллээ.

Сонгогчийн санал авах ажиллагаа маргааш өглөө 7 цагаас оройн 20 цаг хүртэл явагдана. Бэлтгэл ажил хангагдаж дууссан. Санал тоолох төхөөрөмжийг хэсгийн хороодод хүргүүлж, байруудад ариутгал халдваргүйтэл хийсэн. Харин зөөврийн хайрцгаар иргэдээс санал авах ажиллагаа өнөөдөр өглөө 9 цагаас эхэлсэн. Мөн СЕХ-оос санал тоолох машинтай холбоотой гарч байгаа зарим мэдээлэлд тайлбар хийж, техникийн хувьд хакердах ямар ч боломжгүй гэдгийг хэллээ.  

Аймаг, нийслэл, сум, дүүргийн ИТХ-ын сонгуульд 17,149 нэр дэвшигч бүртгүүлэн, үнэмлэхээ авч, хуулийн хугацаанд сурталчилгаагаа хийж дуусгалаа. Энэ хугацаанд цагдаагийн байгууллагад  хуурамч бичиг баримт үйлдэх, нэр дэвшигчдийн нэр төрд халдах зэрэг асуудалтай холбоотойгоор 207 санал гомдол иржээ. 

Д.ДЭЛГЭРСАЙХАН: СХД-Т НЭГ ХАЯГАН ДЭЭР 145 ХҮН АМЬДАРЧ БАЙНА

Сонгууль бүрт гардаг нэг хаяган дээр олон хүн амьдардаг гэх маргааныг энэ удаад гаргахгүйн тулд Улсын бүртгэлийн ерөнхий газраас тодорхой ажлуудыг зохион байгуулсан байна.  Халамж үйлчилгээний төвүүдэд олон иргэд амьдардаг, мөн иргэд шилжилтээ цаг тухайд хийлгэдэггүй зэрэг шалтгаанаас үүдэж энэ төрлийн маргаан гардаг. Тухайлбал СХД-т нэг хаяган дээр 145 хүн амьдарч байгаа тохиолдол байгаа. Тухайн хаяган дээр халамжийн төв үйл ажиллагаа явуулдаг байна. 

Орон нутгийн сонгуулийн зардалд нийт 16.5 тэрбум төгрөг төсөвлөсөн. Мөн коронавируст халдвараас сэргийлэх үүднээс ариутгал халдваргүйтэл хийх, амны хаалт, нэг удаагийн бээлий зэргийг авах үүднээс нэмэлтээр 480 гаруй сая төгрөгийг зарцуулжээ.