Архив...

Намууд

Шинэ намын зөвлөл өнөөдрийн хурлаараа энэ долоо хоногийн чуулганаар хэлэлцэх УИХ-ын тухай хууль, чуулганы хуралдааны дэгийн хууль болон Шүүхийн тухай хуулийн шинэчилсэн найруулгын төслийг хэлэлцсэн байна. Тус намын зүгээс УИХ-ын тухай хуульд нэмэлт өөрчлөлт оруулахдаа гишүүний өргөсөн тангаргаас зарим үгийг хасах санал гаргасан ч дэмжигдээгүй. Тиймээс тусгайлсан хууль өргөн барихаас гадна гишүүд сонгогдсон тойрогтоо амьдардаг байх саналыг гаргаж байгаагаа хэллээ.

Энэ долоо хоногийн УИХ-ын чуулганы хуралдаанаар дэгийн хууль болон УИХ-ын тухай хуулиуд эцэслэн батлагдахаар байгаа. Тэгвэл УИХ-ын тухай хуульд гишүүний өргөх тангаргийг илүү дэлгэрэнгүй болгож өргөсөн тангаргаа няцаж Үндсэн хууль зөрчвөл эгүүлэн татдаг байх зохицуулалтыг тусгасан. Шинэ намын зүгээс гишүүний тангаргийг шинэчлэн тусгахдаа зарим үгийг хасах санал гаргасан. Харин дэмжигдээгүй тул тусгай хууль өргөн барихаа хэллээ.

Үүнээс гадна УИХ-ын хаврын чуулганыг энэ сарын 25-ны өдрөөс өмнө хаах магадлалтай тул Улсын ерөнхий прокурорын тайланг сонсох шаардлагыг Шинэ намаас гаргажээ. Улмаар энэ Лхагва гарагт холбогдох байнгын хороогоор УИХ-ын таван гишүүнээс шалгуулахаар өгсөн 23 хэргийн талаар нээлттэй мэдээлэл сонсохоор төлөвлөжээ.

Шинэ намын зөвлөлийн хурлаар хэлэлцсэн дараагийн асуудал нь Шүүхийн тухай хуульд нэмэлт өөрчлөлт оруулахтай холбоотой УИХ дээр байгаа хоёр хуулийн төслийг нэгтгэн хэлэлцэх ёстой гэж үзжээ. Шүүхийн тухай хуулийн төслийг Засгийн газар өргөн барьсан бол ерөнхийлөгч бас нэг төсөл өргөн барьсан. Тиймээс хоёр төслийг нэгтгэн хэлэлцэх шаардлагатай гэж Шинэ нам үзэж байгаагаа хэллээ.