Намууд

Харин Ардчилсан намын зөвлөл сайжруулсан шахмал түлшний асуудалд анхаарлаа хандуулсан байна. Өргөтгөсөн хуралдаан хийж мэргэжлийн байгууллагаас мэдээлэл сонсчээ. Шахмал түлш хэрэглэх зөвлөмж заавар сайтар өгөөгүйгээс иргэдийн амь нас хохирсон энэ асуудалд хариуцлага тооцох ёстой гэж үзсэн байна. 

Энэ сарын дөрөвний өдрөөс хойш сайжруулсан шахмал түлшнээс ялгарах угаарын хийнд 549 хүн хордож найман хүн амиа алдсан бол 199 хэрэгт хэрэг бүртгэл нээн шалгаж байгааг албаны хүмүүс хэллээ. Тиймээс Ардчилсан намын зөвлөл шахмал түлш яагаад иргэдэд аюул учруулсан болоод нэмж хохирол амсахгүй байх асуудлаар зөвлөлдлөө.

Шахмал түлшийг бүх төрлийн зууханд хэрэглэж болно гэж уутан дээрээ бичсэн хэр нь уламжлалт зуух ханан пийшинд түлэхэд угаар их ялгарсан асуудал судалгаагаар гарч байгаа тул зөвлөмжөө засах хэрэгтэйг хэллээ. Үүнээс гадна алдаа гаргасан албан тушаалтнуудад хариуцлага тооцох хэрэгтэй гэсэн юм.

Ардчилсан намын зүгээс галалгаа зуухны битүүмж зэргээр иргэдэд буруу өгч болохгүйгээс гадна угаарт хордсон иргэдэд нөхөн олговор олгох шаардлагатай гэж үзэж байгаагаа мэдэгдлээ.