Засгийн газар

Монгол Улсын засгийн газар өнөөдөр ээлжит бусаар хуралдлаа. Цар тахлын үед эдийн засгийн хүндрэлийг даван туулах хоёр дахь хөтөлбөрийг боловсруулж дуусгасан байна. Мөн уул уурхай дагасан бүтээн байгуулалт хийх зорилгоор Таван толгойн орд газрын 30 хувь дээр олон улсад IPO гаргахаар төлөвлөсөн. Энэ шийдвэрийг хэт их улстөржүүлж байгаа учраас засгийн газар бүхэлд нь хүчингүй болголоо. Гэхдээ төмөр замын барилгын ажил удаашрахгүй, хэвийн үргэлжлэх боломжтой гэж үзсэн байна.

Өнгөрсөн оны долдугаар сард Эрдэнэс тавантолгой компанийг эдийн засгийн эргэлтэд оруулах замаар олон улсын зах зээлээс хөрөнгө босгож, тус хөрөнгөөр шаардлагатай дэд бүтэц, бүтээн байгуулалтын ажлыг эрчимжүүлэх засгийн газрын 296-р тогтоол гарсан. Тавантолгойн охин компанийн 30 хувьд IPO босгох нь олон зуун жилээр нүүрс зөөн түүнээсээ ашиг олох биш богино хугацаанд хөрөнгө босгож олсон хөрөнгийг бусад салбараа дэмжих чиглэлд зарцуулах үндсэн зорилготой байсан юм. Тэгвэл өнөөдөр засгийн газар ээлжит бусаар хуралдаж тус тогтоолын 2 дахь заалтыг бүхэлд нь хүчингүй болгох шийдвэр гаргалаа. Тогтоолын 2.3. “Эрдэнэс-Тавантолгой” ХК-ийн охин компанийн хувьцааны 30 хүртэлх хувийг гадаад улсын хөрөнгийн биржээр дамжуулан хөрөнгө оруулагчдад санал болгох, 70 буюу түүнээс доошгүй хувийг “Эрдэнэс-Тавантолгой” ХК эзэмшиж байхаар зохион байгуулах ажлыг тусгасан байсан. Тэгвэл үүнийг хүчингүй болгох шийдвэр нь хоёр хүчин зүйлээс хамааралтай.

Нэг талаас Тавантолгой компани 2018, 2019 онуудад ашигтай ажилласны дүнд өөрийн ашгаар Тавантолгой-Зүүнбаян чиглэлийн төмөр замын бүтээн байгуулалтын ажлыг өнөөдрийг хүртэл санхүүжүүлэн ажиллаж байгаа юм.

Харин нөгөө Тавантолгойгоос нүүрс дамжуулан борлуулж ашиг олдог зарим компанийн улс төржилттэй холбоотой юм.

Тодруулбал, Ардчилсан намын даргын зөвлөхөөр ажиллаж байгаа З.Энхболд Тавантолгойн охин компанийн гучин хувийг IPO гаргах замаар Ерөнхий сайд болоод Уул уурхайн сайд нар зарах гэж байна гэж мэдэгдэж байсан удаатай. Гэвч Тавантолгойн ордоос нүүрс дамжуулан борлуулдаг Страто компани түүний хамаарал бүхий этгээдийнх болох нь нотлогдсон. Энэ мэтчилэн улстөрийн хүчин зүйл нөлөөлсөн байна. Тэгвэл тогтоол хүчингүй болсноор төмөр замын ажилд учирч болох хүндрэлийг урьдчилан тооцож, онцгой анхаарч ажиллахыг холбогдох сайд нарт үүрэг болгожээ.

Өнөөдрийн засгийн газрын ээлжит бус хуралдаанаар хэлэлцсэн дараагийн асуудал нь COVID-19 халдварын тархалттай холбогдуулан Монгол Улсын Засгийн газраас эдийн засгийг сэргээх чиглэлээр авах арга хэмжээний хоёр дахь шатны хөтөлбөрийн төслийг боловсруулж Сангийн сайд хуралдаанд танилцуулсан байна. Харин маргааш цар тахлын үед цаашид хэрхэн ажиллах, улс даяар тогтоосон онцгой дэглэмийн хугацааг сунгах эсэх асуудлаар УОК хуралдахаар төлөвлөжээ.