Засгийн газар

Ирэх Даваа гарагаас улсын урд хил Гашуун сухайт боомтоор нүүрс тээвэр эхлэх гэж байна. Коронавирусийн халдвараас урьдчилан сэргийлэхийн тулд хоёр улс өндөр хяналттай ажиллахаар тохиролцжээ. Монгол жолооч нар машинаасаа огт буухгүй, ямар нэг хүнтэй харьцахгүй байх дүрэм үйлчилнэ. Нүүрсээ заасан газарт буулгаад шууд буцах зохицуулалтыг хийсэн байна.

Улсын хэмжээнд онцгой дэглэм тогтоон коронавирусийн халдвараас сэргийлэн ажиллаад хоёр сар гарны хугацаа өнгөрч байна. Энэ хугацаанд эдийн засгийн гол хөшүүрэг болох уул уурхайн бүтээгдэхүүний экспорт зогссон. Гэхдээ эдийн засагт хүндрэл учруулахгүй байх үүднээс зарим нэр төрлийн бүтээгдэхүүнийг бага хэмжээгээр гаргаж байгааг салбарын сайд нар хэллээ. Өнөөдрийн байдлаар 16 мянган тонн зэсийн баяжмал, 9.8 мянган тонн төмрийн хүдэр, хилээр гарахаас гадна Замын-Үүдээр контейнер тээврээр нүүрс гаргаж байна. Харин ирэх Даваа гарагаас Гашуун сухайтын нүүрс тээврийг эхлүүлэхээр төлөвлөжээ.

Одоогоор Гашуунсухайт хилийн боомтоор Оюутолгойн зэсийн баяжмалын тээвэр хийж байгаа 60-70 тээврийн хэрэгсэл нэвтэрч байгаа бол нүүрсний тээвэр огт хийгдэхгүй байна. Жирийн үед өдөртөө нүүрс тээврийн 700-800 машин урд хөрш рүү нэвтэрч тээвэрлэлт хийдэг бол онцгой нөхцөл тул 300-350 тээврийн хэрэгсэл нэвтрүүлэхээр төлөвлөж байна. Учир нь эдийн засаг чухал хэдий ч иргэдийн эрүүл мэнд хамгийн чухал гэдгийг Уул уурхайн сайд онцоллоо.

Гашуун сухайтын Тээвэрлэлтийг эхлүүлэхдээ уртын тээвэр буюу Таван толгойгоос Цагаан хад гаалийн шалган нэвтрүүлэх цэг хүртэл, богинын тээвэр буюу цагаан хаднаас өмнөд хөрш рүү тээвэрлэлт хийж байгаа жолооч нарыг нэг цэгт уулзуулахгүй байх зохицуулалт хийхээр болжээ.