Улсын Их хурал

Улсын Их Хурал өнөөдөр хэд хэдэн томилгоо хийлээ. Удаан хугацаанд шийдгүй байсан Бүгд Найрамдах Хятад Ард Улс, Бүгд Найрамдах Солонгос Улсад суух элчин сайд нарыг үүрэгт ажилд нь илгээлээ. Манай улсын иргэд хамгийн их зорчдог хоёр орон учраас хариуцлагатай ажиллахыг гишүүд сануулсан байна. Мөн элчин сайд нарын асуудлыг Үндэсний аюулгүй байдлын зөвлөл хэлэлцэж томилох нь зүйтэй гэдэг дээр санал нэгдсныг Их хурлын дарга дуулгалаа.

УИХ-ын чуулганы хуралдаанаар БНХАУ болон БНСУ-д суух Онц бөгөөд Бүрэн эрхт элчин сайд нарыг эгүүлэн татаж шинэ элчин сайд нарыг томиллоо. Дээрх хоёр улсад манай улсын олон мянган иргэд ажиллаж амьдардаг тул цар тахал дэгдсэн өнөөгийн нөхцөлд элчин сайдаар томилогдож байгаа хүмүүс ажлаа хариуцлагатай хийх хэрэгтэйг гишүүд сануулж байлаа.

БНХАУ-д суух Онц бөгөөд Бүрэн эрхт элчин сайдаар ОБЕГ-ын дарга, хошууч генерал Т.Бадралыг томиллоо. Түүний томилгоог гишүүд дэмжиж байгаагаа илэрхийлээд БНХАУ-тай эдийн засаг, мал аж ахуй гээд олон салбарт хамтын ажиллагааг өргөжүүлэхэд анхаарах хэрэгтэйг онцоллоо.

Элчин сайдаар томилогдож байгаа Т.Бадрал нь 2004 оноос Гамшгаас хамгаалах ерөнхий газарт мэргэжилтэн, ахлах мэргэжитэн, 2005 оноос Онцгой байдлын ерөнхий газрын хэлтсийн дарга, дэд дарга, 2015 оноос Онцгой байдлын ернхий газрын даргаар өнөөдрийг хүртэл ажилласан, хошууч генерал цолтой юм.

Харин БНСУ-д элчин сайдаар томилогдож байгаа Намсрайн Эрдэнэтуяа нь солонгос судлаач мэргэжилтэй, орон судлалын магистр зэрэгтэй, шадар дипломат цолтой юм. Тэрээр одоо Солонгос Улсад дипломатын чиглэлээр ажиллаж байгаа. Тиймээс Цар тахал дэлхий нийтээр тархаж байгаа өнөөгийн нөхцөлд гадны улсад суугаа иргэдийн эрх ашгийг хамгаалах асуудалд онцгой анхаарч дээрх хоёр томилгоог нэн яаралтай хийх хэрэгтэй гэж ҮАБЗ үзжээ.

Элчин сайдад нэр дэвшигчдийг засгийн газрын хуралдаанаар хэлэлцэн шийдвэрлэсний дагуу МУ-ын Ерөнхийлөгчид өргөн мэдүүлсэн байна. Ерөнхийлөгчийн зүгээс хуульд заасан бүрэн эрхийнхээ хүрээнд дээрх хоёр хүнийг элчин сайдаар томилох асуудлыг зөвшилцөхөөр УИХ-д хүргүүлснийг гишүүдийн олонхи дэмжин томиллоо.