Улсын Их хурал

Үндсэн хуулийн цэц 1992 онд Үндсэн хууль хэрэгжиж эхэлснээс хойших шийдвэрийг хэлэлцэн дүгнэлт гаргадаг. Харин өнөөдөр зарим тогтоол шийдвэр 1991 онд гарсан хуулийн хүрээнд хийгдэж байгаа нь Үндсэн хууль зөрчиж байна гэсэн маргаан гарчээ. Цэц энэ маргааныг хэлэлцээд Үндсэн хууль зөрчсөн гэж үзжээ. Ийм маргаан гаргасан нь Эрдэнэт үйлдвэрийн санхүүгийн албанд тогтоосон онц дэглэмийг зогсоох гэсэн оролдлого гэж Засгийн газрын хэрэг эрхлэх газрын дарга Л.Оюун-Эрдэнэ хэллээ. Яагаад гэвэл онц дэглэм тогтоох ажил 1991 онд батлагдсан хуулийн хүрээнд хийгджээ.

Үндсэн хуулийн цэц он гарснаас хойш анхны дүгнэлтээ өнөөдөр УИХ-аар оруулсан нь Засгийн газрын гишүүдийг бухимдууллаа. Тодруулбал, иргэн Д.Цэрэнбадам ҮХЦ-ийн хэрэг маргааныг хянан шийдвэрлэх ажиллагаанд холбогдох заалт нь өөрөө Үндсэн хууль зөрчиж байна гэх гомдол гаргажээ. Улмаар Үндсэн хуулийн цэцийн дунд суудлын хуралдаанаар маргааныг хянан хэлэлцэж 1992 оны 2 р сарын 12-ны өдрөөс хойш гаргасан хууль тогтоомж албан тушаалтантай холбоотой маргааныг хянан шийдвэрлэнэ гэж үзсэн байна. Ингэснээр 1991 оны хуулиар явж байгаа Засгийн газрын Эрдэнэт үйлдвэрт тогтоосон онцгой дэглэм зогсох эрх зүйн орчин бүрдэх байсан юм. Сонгууль дөхсөн, өвчин тахал гарсан өнөөгийн нөхцөлд 49 хувийг хууль бусаар авсан этгээдүүд "чоно борооноор" гэх үйлдэл гаргалаа хэмээн Засгийн газрын хэрэг эрхлэх газрын дарга шүүмжиллээ.

 Л. ОЮУН-ЭРДЭНЭ: ЭРДЭНЭТ ҮЙЛДВЭРИЙН АСУУДЛААР ХОЁР УДАА МИНИЙ ӨРӨӨНД ОРЖ ИРЖ ДАРАМТАЛСАН

Одоогоос жил орчмын өмнө буюу өнгөрсөн 6-р сард Эрдэнэт үйлдвэрт онцгой дэглэм тогтоож, дэглэмийн хугацааг дахин сунгаад байгаа. Тэгвэл дэглэм тогтоосон болоод сунгах өдөр Засгийн газрын хэрэг эрхлэх газрын даргыг өрөөнд нь дарамталсан хэмээн тэрээр хэллээ. Үүнээс гадна Үндсэн хуулийн цэц хувийн компанийн лоббид автаж ийм шийдвэр оруулж ирж байгаад Хууль зүйн сайд бухимдсан юм. Учир нь цэцийн дунд суудлын хуралдаанд оролцсон Д.Цэрэнбадам гэх хүн 49 хувийг хууль бусаар авах ажиллагаанд оролцсоныг хэллээ.

Ерөнхий сайд асан Ч.Сайханбилэгийн үед Худалдаа хөгжлийн банкны удирдлага болон Д.Эрдэнэбилэг, О.Орхон, Ц.Пүрэвтүвшин тэргүүтнүүд Эрдэнэт үйлдвэрийн 49 хувийг хууль бусаар авсан. Тэгвэл тэдний лобби үндсэн хуулийн цэцээр дамжиж орж ирсэн хэмээн ийнхүү хэллээ. Цэцийн дүгнэлтийг УИХ-ын Хууль зүйн байнгын хороо дэмжиж оруулж ирсэн. Харин байнгын хорооны дарга Х.Нямбаатар дээрх асуудалд тайлбар хийгээгүй юм. Улмаар цэцийн дүгнэлтийг дэмжье гэх саналын томъёоллоор санал хурааж хуралдаанд оролцсон 52 гишүүн 100 хувийн саналаар дэмжсэнгүй.