Улсын Их хурал

Үндсэн хуулийн нэмэлт өөрчлөлтийг хийхдээ гурван асуудал тусгахыг АН эрх баригчдаас хүссэн.  Тэгвэл Ерөнхий сайд танхимаа өөрөө бүрдүүлэх, 2024 оноос холимог тогтолцоог Үндсэн хуульд тусгах зэрэг саналууд дэмжигдсэн байна.  Харин ерөнхийлөгчийг танхимаас сонгох асуудал өнөөдөр Төрийн байгуулалтын байнгын хороодын олон гишүүдийн дунд маргаан үүсгэж талцууллаа. 

Эрх баригчид Үндсэн хуулийн нэмэлт өөрчлөлтийн төслийг гуравдугаар хэлэлцүүлгээр нь шууд батлах шийдвэр гаргасан. Улмаар өнөөдөр УИХ-ын төрийн байгуулалтын байнгын хороо хуралдаж хоёрдугаар хэлэлцүүлгээр дэмжигдсэн 19 зүйл 35 заалт тус бүр дээр санал хураалт явууллаа. Үүнээс гадна Ардчилсан намаас гаргасан гурван саналыг хэлэлцэж Ерөнхий сайд танхимаа өөрөө бүрдүүлэх болон сонгуулийн холимог тогтолцоог Үндсэн хуульд тусгахыг дэмжсэн юм.

Эрх баригч нам, Ардчилсан нам ерөнхийлөгчийн төлөөллөөс бүрдсэн зөвшилцлийн ажлын хэсэг нийт долоон удаа хуралдсан ч ерөнхийлөгчийг парламентаас томилох заалт дээр санал нэгдэж чадсангүй. Үүнээс гадна сонгуулийн холимог тогтолцоог 2024 оноос эхлэн хэрэгжүүлэхээр Үндсэн хуульд тусгахаар шийдсэнд Ардчилсан намын гишүүд бухимдалтай хандлаа. Тэдний сонгуулийн холимог тогтолцоог 2020 оноос хэрэгжүүлэхээр тусгах зарчмын байр суурьтай байгаагаа илэрхийлсэн юм.

УИХ-ын сонгуулийг холимог тогтолцоогоор явуулахдаа олонхыг төлөөлөх болон хувь тэнцүүлэх зарчмыг хослуулна гэж Үндсэн хуульд тусгахаар боллоо. Ингэхдээ сонгогч тойрогт нэр дэвшсэн болон намын жагсаалтад орсон нэр дэвшигчийн төлөө саналаа өгнө гэж тусгах юм байна. Харин хэрэгжих хугацааны тухайд УИХ-ын чуулганаар эцэслэн шийдвэрлэх юм.