Эрүүл мэнд

Эрүүл мэндийн яам, Эрүүл мэндийн хөгжлийн төв,  Монголын эмнэлгийн инженерчлэлийн нийгэмлэг хамтран Эрүүл мэндийн салбарт хэмжлийн нэгдмэл байдлын тогтолцоо бүрдсэний 5 жилийн ойн хүрээнд “Эмнэлгийн тоног төхөөрөмжийн инженерүүдийн дөрөвдүгээр чуулган”-ыг энэ өдрүүдэд зохион байгуулж байна.

Тус чуулганы үеэр эрүүл мэндийн салбарын эмнэлгийн тоног төхөөрөмжийн чанар, аюулгүй байдал, шалгалт тохируулга, хөрөнгө оруулалт, засвар үйлчилгээг сайжруулах, инженер техникчдийн нийгмийн асуудлын талаар хэлэлцүүлэг болж,  засвар үйлчилгээний менежментийн сургалт явагдлаа. Мөн Япон олон улсын хамтын ажиллагааны байгууллага “ЖАЙКА”-ын шугамаар “Эмнэлгийн тоног төхөөрөмжийн удирдлага, засвар үйлчилгээний сургалт” хамрагдсан инженерүүд олон улсыг туршлага, сурч мэдсэн зүйлсээ хуваалцаж, цаашдын зорилго зорилт, үйл ажиллагааг тодорхойллоо.

Чуулганы нээлтэд Монгол Улсын Их Хурлын гишүүн, Засгийн газрын гишүүн, Эрүүл мэндийн сайд Д.Сарангэрэл, Засгийн газрын хэрэгжүүлэгч агентлаг - Стандарт, хэмжил зүйн газар, Шинжлэх Ухаан Технологийн Их Сургуулийн Захирал Б.Очирбат нар оролцож шилдэг эмнэлгийн тоног төхөөрөмжийн инженерүүдэд шагнал гардуулсан юм. Мөн Эрүүл мэндийн яам, Эрүүл мэндийн хөгжлийн төвөөс гадна 21 аймгийн нэгдсэн эмнэлэг, бүсийн оношилгоо эмчилгээний төв, Нийслэлийн эрүүл мэндийн газрын харьяа 9 дүүргийн эрүүл мэндийн төв, хувийн хэвшлийн эрүүл мэндийн байгууллага, зэрэг 200 гаран төлөөлөгч чуулганд оролцлоо.