Эрүүл мэнд

Манай улс бэлгийн замын халдварт өвчны эсрэг хүчтэй тэмцэж байгаа. Эмч мэргэжилтнүүдээ чадавхжуулахад ч гол анхаарлаа хандуулсаар байгаа юм. Тэгвэл урд хөршийн Хөх хотод бэлгийн замын халдварт өвчнийг анагаах чиглэлээр 19 эмч мэргэжил дээшлүүлэхээр болж байна.

Гурван 7 хоног үргэлжлэх сургалтанд хамрагдах эмч нарыг өнөөдөр салбарын сайд Д.Сарангэрэл хүлээн авч уулзлаа. Бэлгийн замаар дамжих халдварт өвчлөл, Монгол улсад эмчлэгддэггүй өвчний тоог бууруулах чиглэлээр Эрүүд мэндийн яамнаас хэд хэдэн шат дараатай ажлуудыг эхлүүлээд байгаа. Энэ ажлын хүрээнд бэлгийн замаар дамжих халдварт өвчлөлөөс урьдчилан сэргийлэх, эмчилгээ зэрэг гадны улс орны практик туршлагаас суралцахаар нийслэл, орон нутгийн нийт 24 их эмч сургалтанд хамрагдахаар болжээ.

Эрүүл мэндийн яамнаас тэмбүү болон, бэлгийн замаар дамжих халдварыг устгах, төрөлхийн тэмбүүгийн өвчлөлийг 90 хувь хүртэл бууруулахаар зорьж байгаа. Энэ ажлын хүрээнд аймаг сумд, нийслэлийн энэ чиглэлийг эмч нарыг шат дараатай чадавхижуулах нь чухал, мөн сургалтанд хамрагдсан эмч нар Үндэсний хэмжээний сургагч багш болох, бэлгийн замаар дамжих өвчлөлийг бууруулахад тодорхой  үүрэг хариуцлага хүлээж байгааг салбарын сайд хэлж байлаа. Түүнчлэн энэ удаагийн сургалтанд шилжилт хөдөлгөөн ихтэй аймаг сумдын энэ чиглэлийн эмч нарыг хамруулжээ.

Энэ онд Эрүүл мэндийн яамнаас сүрьеэгийн чиглэлээр 30, зүрх судасны чиглэлээр 25 эмч мэргэжилтнүүд сургалтанд хамрагдаад байна.  Эдгээр сургалтууд нь манай улсын эрүүл мэндийн салбарын хөгжил, хүний нөөцийг бэхжүүлж чадавхжуулах, эрүүл мэндийн тусламж үйлчилгээний чанар, хүртээмжийг сайжруулах, нотолгоонд суурилсан үр дүнтэй, чанартай тусламж үйлчилгээ үзүүлэхэд үнэтэй хувь нэмэр оруулна гэдгийг салбарын сайд онцолж байлаа.