Ковид-19

Өнөөдрийн 11 цагийн албан ёсны мэдээллээр дэлхий дахинд 5 сая 100 мянган хүн ковид-19 халдвараар өвчилж 333 мянган хүн амь насаа алдаад байна. Ковид-19-ын эсрэг улс, орон бүр судалгаа хийж байгаа. Тэгвэл Оксфордын эрдэмтэд нэгдэн хумхай өвчний эсрэг эм бэлдмэл коронавирусээс урьдчилан сэргийлж чадах эсэхийг судлахаар болжээ. Өнөөдөртөө вакцин байхгүй учраас улс орнууд халдвараас хамгаалах ажлыг л хийж байна. Тэгвэл манай улсын дотооддоо алдалгүй найдвартай хамгаалж байгаа туршлагыг дэлхийн 37 улсад танилцуулахаар төлөвлөжээ. Сайдын түвшинд тавих илтгэл ирэх долоо хоногт байхаар товлогдсон байна. 

Коронавируст халдвартай тэмцэх үүднээс дэлхийн олон улс оронд вакцин гарган авах ажлыг хийж байна. Улс орнууд ч хүн амын эрүүл мэндийн төлөө гар барьж хамтран ажиллаж эхэлсэн. Мөн өвчний хяналтандаа авах үүднээс төрөл бүрийн арга хэмжээнүүдийг дэлхийн улс орнууд авч, үр дүнгээ өгсөн жишээ олон байна. Үүний нэг Монгол Улс. УОК, Эрүүл мэндийн яамнаас шуурхай арга хэмжээ авсан, Тиймээс одоог хүртэл коронавируст халдвар дотоодод бүртгэгдээгүй байгаа юм. Тэгвэл ДЭМБ-ын онлайн хурлын үеэр урьдчилан сэргийлэх болон бэлэн байдлын чиглэлээр хэрэгжүүлж байгаа арга хэмжээг танилцуулж, манай улсын жишээг сайнаар үнэлжээ. Мөн онлайн хуралд оролцсон 37 улс орнууд дундаас Монгол Улсыг сонгож, туршлагаа хуваалцхыг хүссэн байна.