Хууль зөрчиж тендер будлиантуулдаг төрийн алба хаагч нарт хариуцлага тооцох зохицуулалт манай улсад дутмаг байж ирсэн. Үүнийг дагаад төсвийн хөрөнгөөр хийгдэх бүтээн байгуулалтын ажилд тендер тойрсон маргаан тасардаггүй. Тэгвэл өнөөдрийн засгийн газрын хуралдаанаар хууль зөрчсөн төрийн алба хаагчиийг тендер шалгаруулалтад оролцуулахгүй байх, ажлаас халах арга хэмжээ авдаг болохоор шийдвэрлэлээ. Харин нөгөө талд Тендерийн хууль зөрчсөн аж ахуй нэгжийг эцсийн эзэмшигчийн хамт хар жагсаалтад багтаадаг болж байна.

Засгийн газрын ээлжит хуралдаанаар Улаанбаатар-Дархан-Уул аймаг чиглэлийн авто замын бүтээн байгуулалтын ажлын явцыг сонсож танилцжээ. 

Цар тахлын түр хуулийн хэрэгжих хугацааг сунгаснаар ипотекийн зээлийн төлөлт ухарч байна. Сар бүр төлдөг төлбөрөө шинээр хойшлуулах хүсэлтэй бол тухайн банкин дээрээ хүсэлт гаргах ёстойг Төв банкнаас санууллаа. Харин 2021 онд хойшлуулах хүсэлт гаргасан бол автоматаар сунгагдаад явна гэдгийг онцолж байна.  

Омикрон хувилбар дэлхийн зарим орнуудад өдөртөө л 200-400 мянган тохиолдлоор бүртгэгдэж байна. Энэ нь бусад мутацийн тархах хурдаас хэд дахин өндөр байгаа юм. Манай улсад Омикрон хувилбар тархах эрсдэл өндөр, цаг хугацааны асуудал болоод байгаа ч тархсан тохиолдолд хатуу хөл хорио тогтоож хязгаарлах арга хэмжээ авахгүйг УОК-оос мэдэгдлээ. Өнөөдрийн Засгийн газрын хуралдаанаар тусгай журам гаргаж аймаг орон нутгийн удирдлагууд тухайн бүс нутгийнхаа халдварын эрсдэлийн үнэлгээг хийж түвшин тогтоох, хязгаарлах арга хэмжээ авах эрхийг нээж өглөө.   

Засгийн газар эрүүл мэндээ хамгаалж эдийн засгаа сэргээх 10 их наяд төгрөгийн хөтөлбөр хэрэгжүүлээд 200 хоног өнгөрсөн байна. Энэ хүрээнд ямар ажил хийсэн, хэр хэмжээний ажлын байр хадгалж, эдийн засагт ямар сэргэлт бий болгож чадсаныг УИХ-ын гишүүд тодрууллаа. 10 их наядын хөтөлбөрийн хүрээнд 120 мянган ажлын байрыг хадгалж 56 арга хэмээг авч хэрэгжүүлсэн байна. Гэхдээ соёлын арга хэмжээ, судалгааны зардал зэргээр үр ашиггүй зарцуулалтууд их байсныг зарим гишүүд шүүмжиллээ.

2021 онд айл өрхүүдийн зарлага 125 мянган төгрөгөөр буурсан байна. Энэ бол өрхийн орлого буурсныг шууд илтгэх тоон үзүүлэлт гэдгийг гишүүд онцоллоо. Өрхийн орлого буурч, айлуудын амжиргаа муудаж байгаа нь хил гаалийн хаалттай байдал, цар тахлын хөл хорио гээд олон хүчин зүйл нөлөөлж байгааг эдийн засагчид хэлж байна.