Халдварын тохиолдол нэмэгдсэнтэй холбоотой энэ сарын 22-ноос хөл хөдөлгөөнийг хязгаарлан хөл хорио тогтооно гэх ташаа мэдээлэл цахим сүлжээнд тархаж байна. Тэгвэл засгийн газар УОК-оос ямар нэг хязгаарлалт хийж хөл хорио тогтоохгүйг мэдэгдлээ. Төрийн байгууллагууд 100 хувь ажиллаж сар шинийн баярын бөхийн барилдаан ч халдвар хамгааллын дэглэм баримтлан зохион байгуулагдана гэдгийг хэлж байна. Гол нь иргэд дор бүрнээ хариуцлагатай байж сар шинийн баяраа гэр бүлийн хүрээнд тэмдэглэхийг Шадар сайд уриаллаа.

Өнгөрсөн хоногт ковид-19 халдварын 3,088 тохиолдол  бүртгэгдлээ.  Хоногт илэрч байгаа халдварын 90-ээс дээш хувьд Омикрон хувилбар илэрч байна. Энэ сарын сүүл, ирэх сарын эхээр халдвар оргил үедээ хүрч өдөртөө 50-60 мянган тохиолдол батлагдах эрсдэлтэйг мэргэжлийн байгууллага санууллаа. Тиймээс Сар шинийн баярын дараа сурагчдын хичээлийг цахимд шилжүүлэх эсвэл хичээл эхлэх хугацааг долоо хоногоор хойшлуулж магадгүй байна.

Засгийн газар иргэдийн цалин тэтгэврийг нэмэх асуудлыг судалж байгааг эрх баригч намын бүлгийн дарга хэлж байсан. Гэвч Сангийн сайд энэ онд цалин тэтгэврийн хэмжээг нэмэх нь хүндрэлтэйг онцоллоо. Учир нь цалин тэтгэврийн асуудал нийгмийн халамжтай шууд холбоотой. Ковид-19 халдвараас үүдэлтэй эрс нэмэгдсэн халамжийн хэмжээг бууруулж байж цалин тэтгэвэр нэмэх боломжтой гэж байна. Өөрөөр бол 100 мянган төгрөгөөр олгож байгаа хүүхдийн мөнгийг бууруулахаас эхлээд халамжийг багасгаж байж тэтгэвэр тэтгэмжийг нэмэх боломж бүрдэнэ гэдийг онцоллоо. 

Төсвийн хөрөнгө оруулалтаар хийгддэг бүтээн байгуулалтын ажлууд тендер будлиантахаас эхлээд хугацаа хойшлох олон асуудал гардаг. Энэ онд улсын төсвийн хөрөнгө оруулалтаар нийт 717 төсөл арга хэмжээг хэрэгжүүлэхээр төлөвлөсөн. Жилийн энэ үед тендер зарлагдаагүй, хэзээ зарлагдах нь ч тодорхойгүй байдаг байсныг засгийн газрын тэргүүн өөрчилжээ. 3-р сарын 1-ний өдөр гэхэд төсвийн ерөнхийлөн захирагч нар тендертэй холбоотой асуудлаа эцэслэж бүтээн байгуулалтын ажлаа эхлүүл гэдэг чиглэл өгсөн байна.

Засгийн газрын хуралдаанаар төрийн захиргааны зарим албан тушаалтныг ажлаас нь чөлөөлжээ.

Засгийн газрын хуралдаанаар дараах томилгоонуудыг хийлээ.