Дэлхий нийтийн улаанбуудайн хэрэгцээний 60 хүртэл хувийг ОХУ, Украин улсууд нийлүүлдэг. Дайны нөхцөлд байгаа хоёр улс улаанбуудай болоод бусад гол нэрийн бараа бүтээгдэхүүний экспортоо хязгаарлаж эхэлсэн нь олон улсад бараа бүтээгдэхүүний үнийн өсөлт бий болгоод байна. Тиймээс засгийн газрын өнөөдрийн хуралдаанаар тариаланчдын гар дээр бэлэн байгаа 50 мянган тонн улаанбуудайг худалдан авч улсын нөөц бүрдүүлэх шийдвэр гаргалаа. Ингэснээр хаврын тариалалт саадгүй эхэлж гурил гурилан бүтээгдэхүүний үнийг барих боломж бүрдэнэ гэж ХХААХҮ-ийн сайд мэдээллээ.  

Оросын Холбооны Улс Украинтай дайтаж нөхцөл байдал хүнд хэвээр байна. Амаргүй цаг үед хойд хөршөөс авдаг эрчим хүч, шатахууны импортод нөлөөлөх үү гэдгийг салбарын сайд нараас тодрууллаа. Олон улсын нөхцөл байдал цаашдаа хэрхэх нь тодорхойгүй байгаа ч одоогоор цахилгаан, түлшний импортод ямар нэг гацаа үүсээгүй, нөөц хэвийн байгааг хэлж байна.

Монгол Улс өөрсдийн нөөц боломж хүчин чадлаар томоохон төмөр замын бүтээн байгуулалтыг амжилттай хийх болсон. Энэ удаад хагас жилийн дотор 226 км төмөр замыг барьж улсын эдийн засагт шинэ гарцыг нээхээр ажиллаж эхэллээ. Өчигдөр ажил нь эхэлсэн Ханги боомтын төмөр зам ашиглалтад орсноор нүүрсний экспорт одоо байгаа хэмжээнээс 10 дахин нэмэгдэнэ гэж тооцоолж байна. Энэ хэрээр улсын эдийн засагт томоохон  хувь нэмэр оруулж эхэлнэ гэж үзэж байна.

Тавантолгой-Зүүнбаян чиглэлийн төмөр замыг ирэх долоо хоногт нээнэ.

Ирэх сард Монгол Улсын эдийн засгийн чуулган эхэлнэ. Энэ удаагийн чуулган "Шинэ сэргэлт" уриан дор болох юм. Цар тахлын нөхцөл байдлаас үүдэн дэлхийн эдийн засаг ганхсан дээр нь Орос Украины асуудлаас үүдэн дахин хүндэрч болзошгүй байгаа юм. Ийм цаг үед Монгол Улс хохирол бага амсаж, эдийн засгийн хөгжлөө эрчимжүүлэх нь энэ удаагийн чуулганы гол сэдэв байна гэдгийг зохион байгуулагчид онцолж байна.

Тавантолгой-Зүүнбаян чиглэлийн 416 км төмөр зам туршилтын тээврээ хийж эхэллээ. Эхний ээлжинд Оюутолгой компанийн олборлосон баяжмалыг Тавантолгойгоос Сайншанд руу холбож Замын-Үүд боомтоор гаргаж эхэлсэн байна. Бүтээн байгуулалтын ажил үндсэндээ дуусч одоогоор төмөр замын дуут дохио холболт зэрэг жижиг ажлуудыг хийж байгааг албаны хүмүүс мэдээлж байна. Улмаар 3-р сарын 20-ны дотор бүрэн ашиглалтад хүлээлгэн өгөхөөр төлөвлөжээ.