Entertainment

Өнгөрсөн Бямба гарагаас Шанхай хот зуушны баяраа эхлүүлсэн байна. Нэг сар үргэлжлэх энэ үйл ажиллагаа нь ковид-19 цар тахлын үеэр алдагдсан эдийн засгийг өсгөхөд тодорхой хэмжээний хувь нэмрээ оруулах юм байна. Мөн үйл ажиллагааны үеэр хоолны газар, буффетууд маш олон төрлийн хоол хийхээс гадна өндөр хямдрал зарлах юм.

Зуушны баярын хямдрал зарласнаар хоолны газар, үйлчилгээний газрууд эргэн хэвийн үйл ажиллагаандаа орох боломжтой гэж үзсэн тухай CNN телевиз онцолсон байна. Зуушны баярын үйл ажиллагаанд 40 гаруй хүнсний брэндийн 4,700 салбар хамрагдаж, цахим худалдан авалт ч явагдах юм. Хятад Улсын иргэдийн хувьд хоолыг нэгэн төрлийн урлаг гэж үздэг. Шанхай хотын худалдааны холбооны гүйцэтгэх захирлын орлогч Ү-Шин телевизэд өгсөн ярилцлагадаа

“Зууш, бага орцтой хоолнууд нь манай улсын үндэсний хоолноос ялгаагүй. Иргэд ч хамгийн идэх дуртай байдаг. Тиймээс эрэлтийг нэмэгдүүлэх боломжтой гэж үзэж байна”

хэмээжээ. Үүнээс гадна Шанхай хотод энэ сарын сүүлээр 1000 гаруй Хятад үндэсний болон барууны орнуудын хоолны газрыг хамарсан олон улсын хоолны өдөрлөг болох юм байна. Цар тахлын сэргэлт хийж байгаагийн зэрэгцээ, иргэдийн аюулгүй байдалд ихээхэн анхаарч зөвхөн нэг удаагийн хэрэгслүүдийг хэрэглэж байгаа тухай эх сурвалжид онцолжээ.