Манай улс баруун хязгаараа эрчим хүчээр бүрэн хангахын тулд Эрдэнэбүрэнгийн усан цахилгаан станц барьж байгуулахаар болсон. 61 сарын дотор баригдах томоохон бүтээн байгуулалтын ажил ирэх 4-р сараас эхлэх гэж байна. Бэлтгэл ажил бүрэн хангагдсан учраас ажлаа шуурхайлна гэдгийг салбарын сайд хэллээ.
Эрдэнэбүрэнгийн УЦС бол 1964 оноос хойш судалгааны ажил хийгдэж байгаа төсөл бөгөөд энэ оны 4-р сараас эхлэн бүтээн байгуулалтын ажил эхлэхээр төлөвлөжээ. МУ-ын хувьд ил ус багатай тэр тусмаа УЦС барих байгалийн өгөгдөлтэй гол мөрөн цөөн байдаг ч тэдгээрээс дийлэнх нь хил дамжин урсдаг аа. Тийм ч учраас МУ дангаараа бие даан УЦС барихад хүндрэлтэй асуудлууд үүсдэг байна. Эрдэнэбүрэнгийн УЦС барихаар төлөвлөж байгаа Ховд гол бол МУ-ын дотогшоо урсацтай маш цөөн голуудын нэг бөгөөд дотоод болон гадны эрдэмтдийн тооцооллоор 2-3 дараалсан бага дунд чадлын УЦС барих бүрэн боломжтой гэсэн тооцоо судалгаа гарчээ.
Эрдэнэбүрэнгийн УЦС-ын нийт санхүүжилтын 95 хувийг БНХАУ-ын ЗГ-аас МУ-ын ЗГ-т олгож байгаа хөнгөлөлттэй зээлээр, 5 хувийг МУ-ын төсвөөс санхүүжүүлж байгаа гэнэ. УЦС-ын барилга угсралтыг гадны компаниуд хийх бөгөөд түлхүүр гардуулах нөхцөлтэйгээр 61 сарын дотор барьж байгуулах юм байна. Ийнхүү Эрдэнэбүрэнгийн УЦС баригдаж дуусаад МУ-ын ЗГ өмч болох бөгөөд уг төслийн санхүүжилтыг УЦС өөрийн үйл ажиллагааны орлогоороо ойролцоогоор 10 жилийн дотор төлж барагдуулах бүрэн боломжтой гэсэн тооцоо судалгаа гарчээ.