Намууд

Улсын Их Хурал дахь Ардчилсан намын зөвлөл нэг гишүүнээр бүл нэмж наймуулаа болсон. Бүлэг байгуулах эрх нээгдэж байгаа учраас энэ долоо хоногт хүсэлтээ Улсын Их Хурлын даргад хүргүүлэхээр төлөвлөжээ. Ардчилсан намын зөвлөл энэ долоо хоногт цар тахлын тухай хуулийн төсөл дээр анхааралтай ажиллахаа онцолж байна. Ялангуяа тахлын үед төсвийн хөрөнгийг шууд захиран зарцуулах эрхийг Засгийн газарт олгож байгаа нь Үндсэн хуулийн зөрчил болж мэднэ гэдгийг санууллаа.

Жил гарны өмнө хоёр гишүүнээ намаасаа хассан Ардчилсан нам дахин бүлэг байгуулах хүсэлтээ энэ пүрэв гарагт УИХ-ын даргад хүргүүлэхээ мэдэгдлээ. Тус намд УИХ-ын гишүүн О.Баасанхүү элсэн орсон ч хууль эрх зүйн хувьд бүлэг байгуулах боломжгүй гэх байр суурь ч хөвөрч байгаа. Тэгвэл сонгуулийн үр дүнгээр наймаас дээш суудал авсан нам эвсэл бүлэг байгуулж болно гэх хуулийн заалттай тул бүлгээ тараах дахин байгуулах эрх зүйн орчин нээлттэй хэмээн зөвлөлийн дарга онцоллоо. Тус намын зөвлөл өнөөдөр хэд хэдэн асуудлаар хуралдаж цар тахлын хууль Үндсэн хуулийн зарим заалтыг зөрчиж байна гэж дүгнэжээ.

Цар тахлын эсрэг хуулийг Үндсэн хууль болон төсвийн тухай хуультай нийцүүлэх шаардлагатай гэж үзэж байгаагаа хэллээ. Одоо хэлэлцэж байгаа төсөл дээрх хоёр хуультай зөрчилдөж байгаа тул тус нам саналаа хүргүүлнэ гэсэн юм. Үүнээс гадна гадаадад амьдарч байгаа иргэдийн нөхцөл байдал хүнд байгаа тул уг асуудалд онцгой анхаарахыг шаардаж байна гэлээ.

Ардчилсан намын зөвлөл УИХ-ын тухай хуульд нэмэлт өөрчлөлт оруулах хуулийн төсөлд санал солилцжээ. Тэдний зүгээс уг хуулиар парламентын дархлааг сулруулах, гишүүний бүрэн эрхэд халдах хэд хэдэн заалт байгаа тул уг асуудалд онцгой анхаарч ажиллахаа илэрхийллээ.