Архив...

Эдийн засаг

Коронавируст халдварын улмаас эдийн засаг хүндэрч эхэлсэн. 2020 оны сүүлийн улирал улам хэцүүдэж болзошгүйг сануулж байсан юм. Тэгвэл байдал харьцангуй дээрдэж эдийн засаг сэргэж эхэлснийг Монголбанкнаас мэдээллээ. Өсөлт ажиглагдаж байгаа энэ хөдөлгөөн 2021 онд үргэлжилж эдийн засгийн өсөлт 6-8 хувьд хүрнэ гэж тооцоолсон байна. Харин инфляци 6 хувьд хадгалагдана гэдгийг эдийн засагчид хэллээ.

Монгол Улсын эдийн засгийг бодлогын хувьд томоохон хоёр баримт бичгээр удирдаж байгаа. Тодруулбал, төрөөс баримтлах мөнгөний бодлого болоод төсвийн бодлогоор зохицуулдаг тул төсөв мөнгөний бодлого харилцан уялдаатай байх ёстойг эдийн засагчид хэлдэг. Ирэх оны улсын нэгдсэн төсвийг засгийн газар боловсруулж УИХ-д өргөн барихдаа эдийн засгийг харьцангуй өөдрөгөөр төсөөлж төсвийн алдагдлыг 2 дахин бууруулан тооцсон. Тэгвэл Төв банк ирэх оны мөнгөний бодлогыг тодорхойлохдоо уул уурхайгаас орох орлого нэмэгдэж, валютын ханш тогтвортой, инфляци хөөрөгдөхгүйн дээр эдийн засаг 6-8 хувиар өснө гэж үзжээ.
Ковид-19 цар тахлын нөлөөгөөр манай улсын эдийн засаг 9.7 хувиар агшиж экспортын орлого буурсан нь валютын ханшинд дарамт үүсгэсэн гэдгийг хэлж байна. Өнөөдрийн байдлаар төгрөгийн ханш 4 хувиар суларсан бол ирэх онд харьцангуй тогтвортой байна гэдгийг Төв банкнаас онцоллоо. Учир нь 2020 оны сүүлийн хоёр улиралд эдийн засаг тасралтгүй унана гэж тооцож байсан ч байдал эсрэгээрээ эргэсэн тул ирэх онд улсын эдийн засаг харьцангуй сайжирна гэж үзсэн байна.
Уул уурхайгаас олох орлого нэмэгдэх хандлагатай байгаа тул цар тахлын үед авч хэрэгжүүлж байгаа арга хэмжээнүүдийг 7-р сар хүртэл үргэлжлүүлэхээр засгийн газарт төсөвт тусгасан. Тодруулбал нийгмийн даатгалын шимтгэлийг 5 хувиар бууруулж 17 хувиар авах юм. Үүний талыг ажил олгогч талыг ажилтан төлнө гэсэн үг. Харин хүүхдийн мөнгийг 100 мянган төгрөгөөр нь үргэлжлүүлэн олгох бол аж ахуй нэгжүүдэд дэмжих зорилгоор 2021 онд татвар нэмэхгүй гэж байгаа юм.