Үйл явдал

Японы нийслэл Токио хотноо пүрэв гарагт гамшгаас сэргийлэх олон нийтийн сургуулилт явуулжээ. Токио хотноо газар хөдлөлтийн үеийн гамшгийн эсрэг олныг хамарсан дадлага сургуулилтыг ирэх онд Японы нийслэлд болох Олимп, Паралимпийн наадамтай холбон зохион байгуулсан байна. 

Токио хотод болсон нэгдсэн сургуулилтад 650 хүн, тэр дундаа нийслэл хотын захиргааны ажилтнууд, орон нутгийн цагдаа, гал сөнөөх албаныхан нэгдэн оролцжээ. Нэгдсэн дадлага сургуулилтыг Токио орчимд 2020 оны 7-р сарын 26-нд 7,3 магнитудын хүчтэй газар хөдлөлт болж, энэ үед гамшгийн эсрэг хэрхэн нэгдэн ажиллах, гамшгийн үеийн арга хэмжээ, нүүлгэн шилжүүлэлт, аврах ажиллагааг хэрхэн явуулах зэрэг даалгаврын дагуу явуулсан байна. Олимпийн наадмын уралдаан тэмцээнүүд Токио хотын 20-иод барилга байгууламж, спортын цэнгэлдэх хүрээлэнд болох юм. Тиймээс гамшгийн эсрэг дадлага сургуулилтыг Токиогийн захад байрлах Ариаке дахь гимнастикийн төвд явуулжээ. Дадлага сургуулилтад хамрагдсан хүмүүст япон болон англи хэлээр зааварчилгаа өгч, гамшгийн нөхцөл байдалд айж сандралгүйгээр тайван байдлаар, нэгдсэн зохион байгуулалтанд орж, нүүлгэн шилжүүлэх ажиллагаанд хамрагдан, хэрхэн барилгаас аюул осолгүй гарах дадлыг хийжээ. Түүнчлэн аврагчид болон түргэн тусламжийнханы ажлыг дараалал, зохион байгуулалт, гамшигт өртсөн бүс дэх хүн амд хэрхэн тусламж үзүүлэх зэргийг сургуулилсан байна. Токиогийн Олимп, Паралимпийн наадмын аюулгүй байдлыг хариуцсан албаны тэргүүн Хироя Яримицугийн ярьснаар гамшиг осол нүүрлэсэн үед хамгийн чухал нь олон хэлээр ярьж, зааварчилгаа өгөх мэргэжилтнүүд чухал болохыг тэмдэглэжээ.